پلوٹو نظام شمسی کا نواں اور آخری سیارہ ہے جو سورج سے تقریباً 6 بلین کلومیٹر دور ہے اور سورج کے گرد ایک چکر لگانے میں اسے 248 سال لگتے ہیں۔ بے چارے کو بہت محنت کرنی پڑتی ہے۔ پھر یوں ہوا کہ انسانوں نے سن 2006 میں پلوٹو کو سیاروں کی فہرست سے نکال دیا اور اسے بونا سیارہ بنا دیا مگر بے چارے پلوٹو کو اس کا پتہ ہی نہ چلا اور وہ یونہی سیارے کے طور پر سورج کے گرد چکر لگاتا رہا۔ پھر ایک دن چٹان کا ایک آوارہ ٹکڑا اس کے قریب سے گزرا تو اس نے پلوٹو سے کہا، "میاں تم خواہ مخواہ ہی اتنی محنت کر رہے ہو، تمہیں تو سیاروں کی فہرست سے نکال دیا ہے اور اب تمہیں بونا سیارہ کہتے ہیں۔"
پلوٹو اس کی بات سن کر مسکرایا اور بولا، "ہمیں اپنا کام پوری ایمانداری سے کرتے رہنا چاہیے اور اس بات کی کوئی پروا نہیں کرنا چاہیے کہ کوئی ہمیں کیا سمجھتا ہے اور کیا کہتا ہے۔"
پلوٹو کی بات سن کر چٹان شرمندہ ہو کر آگے بڑھ گئی اور پلوٹو اس محنت سے اپنے کام میں جتا رہا اور سورج کے گرد چکر لگاتا رہا۔
